(14) 4. สนฺถารวคฺโค

[152] ‘‘ทฺเวเม , ภิกฺขเว, สนฺถารา [สนฺธารา (ก.)]ฯ กตเม ทฺเว? อามิสสนฺถาโร จ ธมฺมสนฺถาโร จฯ อิเม โข, ภิกฺขเว, ทฺเว สนฺถาราฯ เอตทคฺคํ, ภิกฺขเว, อิเมสํ ทฺวินฺนํ สนฺถารานํ ยทิทํ ธมฺมสนฺถาโร’’ติฯ

[153] ‘‘ทฺเวเม, ภิกฺขเว, ปฏิสนฺถารา [ปฏิสนฺธารา (ก.)]ฯ กตเม ทฺเว? อามิสปฏิสนฺถาโร จ ธมฺมปฏิสนฺถาโร จฯ อิเม โข, ภิกฺขเว, ทฺเว ปฏิสนฺถาราฯ เอตทคฺคํ, ภิกฺขเว, อิเมสํ ทฺวินฺนํ ปฏิสนฺถารานํ ยทิทํ ธมฺมปฏิสนฺถาโร’’ติฯ

[154] ‘‘ทฺเวมา, ภิกฺขเว, เอสนาฯ กตมา ทฺเว? อามิเสสนา จ ธมฺเมสนา จฯ อิมา โข, ภิกฺขเว, ทฺเว เอสนาฯ เอตทคฺคํ, ภิกฺขเว, อิมาสํ ทฺวินฺนํ เอสนานํ ยทิทํ ธมฺเมสนา’’ติฯ

[155] ‘‘ทฺเวมา, ภิกฺขเว, ปริเยสนาฯ กตมา ทฺเว? อามิสปริเยสนา จ ธมฺมปริเยสนา จฯ อิมา โข, ภิกฺขเว, ทฺเว ปริเยสนาฯ เอตทคฺคํ, ภิกฺขเว, อิมาสํ ทฺวินฺนํ ปริเยสนานํ ยทิทํ ธมฺมปริเยสนา’’ติฯ

[156] ‘‘ทฺเวมา, ภิกฺขเว, ปริเยฏฺฐิโยฯ กตมา ทฺเว? อามิสปริเยฏฺฐิ จ ธมฺมปริเยฏฺฐิ จฯ อิมา โข, ภิกฺขเว, ทฺเว ปริเยฏฺฐิโยฯ เอตทคฺคํ, ภิกฺขเว, อิมาสํ ทฺวินฺนํ ปริเยฏฺฐีนํ ยทิทํ ธมฺมปริเยฏฺฐี’’ติฯ

[157] ‘‘ทฺเวมา , ภิกฺขเว, ปูชาฯ กตมา ทฺเว? อามิสปูชา จ ธมฺมปูชา จฯ อิมา โข ภิกฺขเว, ทฺเว ปูชาฯ เอตทคฺคํ, ภิกฺขเว, อิมาสํ ทฺวินฺนํ ปูชานํ ยทิทํ ธมฺมปูชา’’ติฯ

[158] ‘‘ทฺเวมานิ, ภิกฺขเว, อาติเถยฺยานิฯ กตมานิ ทฺเว? อามิสาติเถยฺยญฺจ ธมฺมาติเถยฺยญฺจ ฯ อิมานิ โข, ภิกฺขเว, ทฺเว อาติเถยฺยานิฯ เอตทคฺคํ, ภิกฺขเว, อิเมสํ ทฺวินฺนํ อาติเถยฺยานํ ยทิทํ ธมฺมาติเถยฺย’’นฺติฯ

[159] ‘‘ทฺเวมา, ภิกฺขเว, อิทฺธิโยฯ กตมา ทฺเว? อามิสิทฺธิ จ ธมฺมิทฺธิ จฯ อิมา โข, ภิกฺขเว, ทฺเว อิทฺธิโยฯ เอตทคฺคํ, ภิกฺขเว, อิมาสํ ทฺวินฺนํ อิทฺธีนํ ยทิทํ ธมฺมิทฺธี’’ติฯ

[160] ‘‘ทฺเวมา , ภิกฺขเว, วุทฺธิโยฯ กตมา ทฺเว? อามิสวุทฺธิ จ ธมฺมวุทฺธิ จฯ อิมา โข, ภิกฺขเว, ทฺเว วุทฺธิโยฯ เอตทคฺคํ, ภิกฺขเว, อิมาสํ ทฺวินฺนํ วุทฺธีนํ ยทิทํ ธมฺมวุทฺธี’’ติฯ

[161] ‘‘ทฺเวมานิ , ภิกฺขเว, รตนานิฯ กตมานิ ทฺเว? อามิสรตนญฺจ ธมฺมรตนญฺจฯ อิมานิ โข, ภิกฺขเว, ทฺเว รตนานิฯ เอตทคฺคํ, ภิกฺขเว, อิเมสํ ทฺวินฺนํ รตนานํ ยทิทํ ธมฺมรตน’’นฺติฯ

[162] ‘‘ทฺเวเม, ภิกฺขเว, สนฺนิจยาฯ กตเม ทฺเว? อามิสสนฺนิจโย จ ธมฺมสนฺนิจโย จฯ อิเม โข, ภิกฺขเว, ทฺเว สนฺนิจยาฯ เอตทคฺคํ, ภิกฺขเว, อิเมสํ ทฺวินฺนํ สนฺนิจยานํ ยทิทํ ธมฺมสนฺนิจโย’’ติฯ

[163] ‘‘ทฺเวมานิ, ภิกฺขเว, เวปุลฺลานิฯ กตมานิ ทฺเว? อามิสเวปุลฺลญฺจ ธมฺมเวปุลฺลญฺจฯ อิมานิ โข, ภิกฺขเว, ทฺเว เวปุลฺลานิฯ เอตทคฺคํ, ภิกฺขเว, อิเมสํ ทฺวินฺนํ เวปุลฺลานํ ยทิทํ ธมฺมเวปุลฺล’’นฺติฯ

สนฺถารวคฺโค จตุตฺโถฯ

(15) 5. สมาปตฺติวคฺโค

[164] ‘‘ทฺเวเม , ภิกฺขเว, ธมฺมาฯ กตเม ทฺเว? สมาปตฺติกุสลตา จ สมาปตฺติวุฏฺฐานกุสลตา จฯ อิเม โข, ภิกฺขเว, ทฺเว ธมฺมา’’ติฯ

[165] ‘‘ทฺเวเม, ภิกฺขเว, ธมฺมาฯ กตเม ทฺเว? อชฺชวญฺจ มทฺทวญฺจฯ อิเม โข, ภิกฺขเว, ทฺเว ธมฺมา’’ฯ

[166] ‘‘ทฺเวเม, ภิกฺขเว, ธมฺมาฯ กตเม ทฺเว? ขนฺติ จ โสรจฺจญฺจฯ อิเม โข, ภิกฺขเว, ทฺเว ธมฺมา’’ฯ

[167] ‘‘ทฺเวเม, ภิกฺขเว, ธมฺมาฯ กตเม ทฺเว? สาขลฺยญฺจ ปฏิสนฺถาโร จฯ อิเม โข, ภิกฺขเว, ทฺเว ธมฺมา’’ฯ

[168] ‘ทฺเวเม, ภิกฺขเว, ธมฺมาฯ กตเม ทฺเว? อวิหิํสา จ โสเจยฺยญฺจฯ อิเม โข, ภิกฺขเว, ทฺเว ธมฺมา’’ฯ

[169] ‘‘ทฺเวเม, ภิกฺขเว, ธมฺมาฯ กตเม ทฺเว? อินฺทฺริเยสุ อคุตฺตทฺวารตา จ โภชเน อมตฺตญฺญุตา จฯ อิเม โข, ภิกฺขเว, ทฺเว ธมฺมา’’ฯ